Benuujd waem veer zeen…?!
Leer ós kinne door ós sjtatiefotoos te bekieke en ós verhaolkes te laeze…

 

	Janou Brouns - Veurzitster Ich bön Janou, 24 jaor aad en woon in de sjoonste sjtad van Limburg; Remunj! Van kleins aaf aan bön ich betrokke biej 't vastelaovesspjeel. Jaore höb ich gedans biej d'n Uul, begonne biej de kienjergarde en geeindig biej de damesgarde. Vastelaovend viere zit mich in 't blood. In 't dageliks laeve wirk ich as management assistente, dit doon ich mit veul plezeer. Es ich vriej höb gaon ich gaer op sjtap mit mien vrunj of zit lekker op 't terras te geneete van 't zunke. Dit sjoon spjektakel organizere vinj ich een echte oetdaging.
	Madelon Goedemans - Artieste & Prezentasie Ich bön Madelon, gebaore en getaoge in Remunj. Woonechtig oppe Hamstraot, fijn midde in de sjtad. In 't dagelijks laeve gaef ich praktijklesse aan studente die later in de zorg wille gaon werke. Dit doon ich binne Gilde Opleidingen in Remunj. Same mit mien vriendinne hubbe veer de eer gekrege om de Remunjse vrouwluujzitting te gaon organizere. Mien ongerdeil is mit name 't prizzentere van de zitting en same mit de maedjes höbbe veer oos sjouwers d'r onger gezat om d'r veur te zorge det geer auch dees aankommende jaore mit volle teuge kint gaon geneete van sjoone zittingen. Ich wins uch alvas vaöl plezeer, en bedank uch veur uch vertrouwe in ós!
	Ankie Jansens - Sjponsering Ich bön Ankie, bön 20 vastelaovends geleeje gebaore en de aafgelaupe 20 jaor in Remunj getaoge. Ich sjtudeer nog en volg de opleiding commersjele economie in Sittard. Verder gaon ich gaer sjtappe mit mien vriendinne. Ich bön mit mien 20 jaor de jongste van os gezelsjap mer os motto is dan auch: "De Vrouwluujzitting is veur JONK en AAD!!!" Om de vrouwluujzitting te moge organizere is veur mich ein oetdaging en gaon er dan auch veur de volle 100% veur om same mit de anger dames de vrouwluujzitting 2009 toet ein succes te maken. Veer zeen ós sjnel!
	Ellen Mooren - Sjponsering Ich bön Ellen en woon zo es de res van de vrouwluuj in Remunj. Miene tied vul ich gaer mit wirke biej Cafe Le Journal en lekker opsjtap gaon in het Remunjse oetgaonslaeve. Daorom organiseer ich auch mit plezeer mit mien vriendinne de Remunjse Vrouwluujzitting. Door de waek werk ich fulltime op ein notariskantoor en amuseer ich mich mit miene leeve vrundj wo ich mit samewoon. Ich höb ontzettend vaöl zin in de zitting en ich belaof uch dat het eine fantastiese daag waerd.
	Dionne Vossen - Penningmeisteres Ich bön Dionne (dochter van aad Uule prins Rob Vossen). Ich kom dus oet ein ech vastelaoves-nes. Net es Janou bön ich begonne biej de kienjergarde en geeindigbiej de damesgarde. In mien dageliks laeve werk ich biej ein financieel adviesburo in Remunj. In miene vrieje tied gaon ich gaer op sjtap of ein lekker hepke aete. Vanaaf noe geit d'r naeve heel vaöl tied zitte in het organizere van de vrouwluujzitting. Ich vinj het dan auch helemaol geweldig om dit ivenement mit mien beste vriendinne te organizere.
	Renée Janssen - Kreatief Brein Ich bön Renée, dochter van Léon en Liesbeth Janssen. Opgegreujd mit mien broor Rob en mien zöster Susan op de Donderberg. Mien vader waas lang geleje prins van de Katers oet Neel. Dus geer begriep natuurlik waal det Vastelaovend der "mit de paplaepel is ingegaote"! Zelf gaon ich gaer op sjtap mit dit festein (netuurlik auch door 't jaor haer..). Maar geer vindj mich döks neet véur maar achter de bar. 40 Oer van de waek bring ich namelik door biej Cafe Le Journal op 't Sjtasieplein. Ich vinj 't geweldig det ich mit mien beste vriendinne, de Vrouwluujzitting moog organizere. De zenuwe beginne noe al te komme. Maar ich höb der zin in!
	Claire van het Erve - Kreatief Brein Ich bön Claire en heur auch biej dit gek gruupke vrouwluuj! 24 jaor geleeje in ein drukkersfemiliej gebaore, es dochter van Kim en Martin van het Erve. Nao lang tósse de sinjores & cabajeeros in Sjpanje te höbbe gefees zit ich taegeweurdig 't Limburgse volk achter de vaere aan en zorg det nao alle zittinge die "beer-kiloos" d'r weer aafgetraint waere. Mer eers, veur det veer dao aan beginne, effe lekker feeste! Toet oppe zitting!